Разорни поплави ја погодија Кина, откако обилни дождови предизвикаа хаос во јужните и централните делови на земјата. Според последните информации, најмалку десет лица го загубиле животот, додека огромен број жители биле принудени да ги напуштат своите домови.
Кинеските медиуми јавуваат дека најтрагичниот инцидент се случил во регионот Гуангси, каде надојдена река однела пикап-возило во кое имало 15 патници. Во несреќата загинале најмалку шест лица, додека спасувачките екипи продолжуваат со потрагата и расчистувањето на теренот.
Дополнителни жртви биле регистрирани и во провинцијата Хубеи, каде три лица загинале во поројни поплави што зафатиле едно село. Уште едно лице го загубило животот во провинцијата Хунан.
Поради опасноста од нови врнежи и свлечишта, кинеската метеоролошка агенција издаде предупредувања за повеќе региони, меѓу кои Џјангси, Анхуеј, Гуиџоу, Гуангдунг и Хаинан. Властите предупредуваат дека постои висок ризик од нови поројни поплави и лизгање на земјиштето.
Во повеќе области веќе е започната евакуација на населението, а илјадници луѓе биле преместени од најзагрозените подрачја.
Особено драматична е состојбата во градот Џингџоу, каде е урнат историски рекорд по количината на врнежи, највисок откако метеоролошката станица започнала со мерења уште во 1953 година.
Според локалните власти, во спасувачките операции во Хубеи биле ангажирани повеќе од 1.410 пожарникари, над 90 специјални спасувачки возила, повеќе од 1.500 парчиња опрема и околу 100 чамци за евакуација и спасување.
Поплавите предизвикале сериозен хаос и во сообраќајот. Во погодените региони бил запрен јавниот превоз, вклучително и автобускиот, такси и меѓуградскиот транспорт, а на одредени места имало и прекини во снабдувањето со електрична енергија.
Кинеските власти упатија апел до граѓаните да избегнуваат непотребни патувања и да ги следат инструкциите на службите, бидејќи временските услови и понатаму остануваат опасни и непредвидливи.
