Голем пожар што избувна во областа Сими Вали, недалеку од Лос Анџелес, предизвика масовни евакуации и сериозна загриженост кај локалните власти, додека огнената стихија продолжува брзо да се шири.
Според американските медиуми, пожарот започнал непосредно пред 11 часот во грмушеста област и во почетокот зафатил околу 80 хектари. Сепак, само неколку часа подоцна огнот драматично се проширил и до вечерта зафатил повеќе од 530 хектари.
Информациите ги потврди Калифорниско одделение за шумарство и заштита од пожари, од каде предупредуваат дека пожарот претставува сериозна опасност за населени места и инфраструктура во регионот.
Властите наредиле евакуација на повеќе од 29.000 жители, додека уште над 11.000 лица се ставени под предупредување и подготвеност за можна итна евакуација. Пожарникарите водат тешка битка со огнот во обид да го стават под контрола пред дополнително да се прошири кон населените делови.
Досега е потврдено дека најмалку една куќа е целосно уништена, но пожарот и понатаму се заканува на илјадници домови и други објекти во околината.
Во гаснењето се вклучени околу 500 пожарникари, а сцените од теренот покажуваат густ чад што се издига над ридовите во близина на автопатот. Во операцијата учествуваат и специјални копнени екипи, три противпожарни авиони-цистерни и шест хеликоптери кои постојано исфрлаат вода врз критичните области.
Пожарот избувнал и во близина на неколку училишта во Сими Вали, поради што локалните власти ги прекинале сите активности на отворено. Учениците биле задржани во училниците поради опасно загадениот воздух и густата чадна покривка.
Според Канцеларија на шерифот на округот Вентура, основните училишта „Крествју“ и „Маунтин Вју“ биле евакуирани, а учениците и персоналот биле префрлени во средното училиште „Сими Вали“ како безбедносна мерка.
Властите внимателно ја следат состојбата, а граѓаните добиваат апели строго да ги почитуваат наредбите за евакуација додека пожарот сè уште е активен и непредвидлив.
