На прв поглед, одлуката на Lufthansa да ја прекине директната линија меѓу Скопје и Франкфурт може да изгледа како уште едно укинување на авионска рута. Но во реалноста, последиците се многу поголеми отколку што изгледа на прв поглед. Македонија не останува без летови кон Германија, туку без директен пристап до еден од најважните светски авио-хабови.
Разликата е огромна. Лет до германски град не значи автоматски и добра глобална поврзаност. Главниот аеродром во Франкфурт е една од најголемите транзитни точки во Европа и светот, преку која патниците продолжуваат кон САД, Канада, азиските земји, европските метрополи и бројни интерконтинентални дестинации. За многу патници од Македонија, летот до Франкфурт не беше крајна дестинација, туку најбрзиот и наједноставниот пат кон остатокот од светот.
Lufthansa ја воведе линијата Скопје–Франкфурт во април 2023 година, а во одредени периоди таа функционираше и со до десет летови неделно. Првично беше најавено дека линијата ќе биде паузирана само во јуни, но подоцна летовите беа повлечени и од остатокот на летната сезона, како и од зимскиот распоред што започнува на 25 октомври.
Наместо директна врска со Франкфурт, патниците сега главно ќе бидат насочувани кон летови преку Виена преку Austrian Airlines, компанија која е дел од Lufthansa Group. Тоа во пракса значи повеќе преседнувања, подолги патувања и помалку удобни конекции за голем број патници.
Со укинувањето на линијата се губат околу десет неделни ротации меѓу Скопје и Франкфурт, односно до дваесет авионски движења неделно ако се сметаат и пристигнувањата и заминувањата. На хартија можеби тоа не изгледа драматично, но за патниците што редовно патуваа преку Франкфурт, промената е сериозна.
Важно е да се нагласи дека Македонија и понатаму останува поврзана со Германија преку нискобуџетни линии на Wizz Air. Од Скопје и натаму ќе има летови кон градови како Берлин, Дортмунд, Хамбург, Штутгарт и други германски дестинации.
Но тука постои важна разлика. Голем дел од нискобуџетните линии слетуваат на секундарни или регионални аеродроми. Така, на пример, Франкфурт-Хан не е исто што и главниот аеродром во Франкфурт. Тој се наоѓа далеку од самиот град и нема ниту приближно иста транзитна улога како Frankfurt Main.
Токму затоа проблемот не е во тоа дали ќе може да се патува до Германија. Ќе може. Проблемот е што се губи директна врска со глобалниот систем на Lufthansa и можноста со едно преседнување да се стигне речиси насекаде во светот.
Ова особено ќе го почувствуваат бизнис-патниците, луѓето што често патуваат, студентите, дијаспората, како и патниците што преку Франкфурт продолжуваа кон Северна Америка, Азија и други далечни дестинации.
Од друга страна, повлекувањето на Lufthansa не е изолиран случај. Во последниот период Lufthansa Group прави сериозни промени во својата европска мрежа, концентрирајќи ги летовите околу своите главни центри. Очигледно, Скопје не останало доволно профитабилна или стратешки важна точка за директна линија кон Франкфурт.
Ова повторно го отвора прашањето каква авио-поврзаност сака и може да одржи Македонија. Нискобуџетните компании носат голем број патници и достапни цени, но директните врски со големи европски и светски хабови носат нешто многу поважно – побрза меѓународна мобилност, подобри конекции и посилна интеграција со глобалните текови.
Затоа, веста за заминувањето на Lufthansa не е само информација за една укината линија. Таа е потсетник дека вистинската авионска поврзаност не се мери само со бројот на дестинации, туку и со тоа колку лесно тие дестинации нè поврзуваат со остатокот од светот.
