Германската полиција спроведе голема операција насочена кон производство и дистрибуција на нацистичка и неонацистичка музика, при што биле запленети околу 33.000 аудиоснимки на компакт дискови, плочи и касети.
Полицијата и обвинителството во петокот соопштија дека акцијата не била ограничена само на Германија, туку биле извршени претреси и во неколку други европски земји.
Повеќе од 20.000 аудионосачи биле пронајдени при претресите на домовите на четворица главни осомничени во источногерманската покраина Мекленбург-Западна Померанија.
Во рамките на операцијата биле запленети и околу 130 уреди за складирање податоци, меѓу кои хард дискови, мобилни телефони и USB-уреди. Вкупната вредност на имотот што бил конфискуван се проценува на околу два милиони евра.
Од таа сума, кај четворицата главни осомничени биле пронајдени и околу 11.000 евра во готовина.
Според истражителите, операцијата била насочена кон музика која претставува дел од идеолошки материјали поврзани со нацизмот, антисемитизмот, расизмот и дехуманизирачки ставови.
Осомничените се на возраст од 55, 52, 48 и 43 години. Според обвинителството, тие најдоцна од 2020 година соработувале во производство и продажба на плочи и ЦД-а со неонацистичка музика.
Четворицата се товарат и за членство во екстремно десничарска криминална организација.
Полициската акција имала и меѓународна димензија. Претреси биле извршени во компании во Естонија, Италија, Полска и Чешка, за кои постоеле сомневања дека биле вклучени во продукција на снимки со нацистичка музика.
Сепак, во заедничкото соопштение на германските власти се наведува дека компаниите од овие земји не биле свесни за видот на музиката што ја пренесувале на аудионосачите.
