Шеесет и четиригодишен маж од Србија преживеал опасен напад од рој стршлени додека собирал огревни дрва, откако бил изложен на голем број убоди по телото. Лекарите му констатирале околу 30 убоди на грбот, како и дополнителни убоди на главата и нозете.
Инцидентот се случил на 28 септември, кога мажот заедно со својот внук со трактор собирал дрва. Околу 13 часот, при нивното петто враќање, машината зафатила суво стебло од цреша, по што од него излетал рој стршлени и го нападнале.
Благодарение на брзата реакција на неговиот внук, соседот и медицинските екипи од Бајина Башта и Ужице, ситуацијата завршила без фатални последици.
Нападнатиот маж раскажал дека инсектите го напаѓале по целото тело и дека убодите ги почувствувал и преку облеката.
„Ме нападнаа и ме избодоа по целото тело. Носев маица и фармерки, но ме избодоа и низ нив. Горан скрши голема гранка од лешник и се обиде да ги исплаши со неа. Почувствував силна болка, но не ја изгубив свеста“, сведочи тој.
По укажаната прва помош и брзата реакција на медицинските тимови, пациентот бил пренесен во Општата болница во Ужице. Таму добивал терапија до еден часот по полноќ, по што бил пуштен на домашно лекување.
Мажот изразил голема благодарност до медицинскиот персонал кој му помогнал во критичниот момент, особено до д-р Небојша Јовановиќ и неговиот тим, како и до лекарите во Ужице.
„Немам зборови да му се заблагодарам на д-р Небојша Јовановиќ, на неговиот тим и на лекарите од Ужице за сè што направија за да ми го спасат животот. Д-р Јовановиќ ме викаше во следните два дена за да провери како сум“, раскажал тој.
