Киргистан, Таџикистан и Узбекистан ги засилија санитарно-епидемиолошките мерки на своите гранични премини по информациите за можен случај на чума во руската Иркутска област. Дополнителен санитарен надзор воведе и Казахстан, кој дели долга граница со Русија.
Киргистан ги зголеми превентивните и контролните активности на граничните премини откако во јавноста се појавија информации за можен случај на чума во Русија. Министерството за здравство во Бишкек соопшти дека санитарно-карантинските пунктови се ставени во состојба на зголемена готовност.
Од Министерството наведуваат дека надлежните служби ги следат лицата, возилата и товарот што ја преминуваат државната граница, со цел да се спречи внесување и ширење на заразни болести, вклучително и инфекции кои се сметаат за особено опасни. Според институцијата, состојбата се наоѓа под контрола на санитарно-епидемиолошките служби.
Засилени мерки се применуваат и во Таџикистан. На санитарно-карантинските пунктови се спроведуваат дополнителни проверки на патниците, меѓу кои и мерење на телесната температура и проверка за евентуални симптоми. На санитарните работници им е препорачано да користат лична заштитна опрема.
И Узбекистан ја зголеми подготвеноста на своите санитарно-епидемиолошки служби. Надлежните внимателно ја следат ситуацијата во Русија и информациите поврзани со можниот случај, како и евентуалниот ризик од внесување на инфекцијата во земјата.
Дополнителен санитарен надзор спроведува и Казахстан. Иако земјата дели долгa граница со Русија, тамошното Министерство за здравство проценува дека ризикот од внесување на инфекцијата во Казахстан во моментов е низок.
Причина за зголемената внимателност е смртниот случај на 28-годишна работничка во Иркутскиот научноистражувачки институт за борба против чумата. Жената починала по тешко белодробно заболување, а околу 200 лица кои биле во контакт со неа се ставени под медицински надзор.
Во дел од медиумските извештаи се појавија наводи дека постои сомнеж оти жената можеби била заразена со белодробна чума. Сепак, руските здравствени власти засега не потврдуваат дека станува збор за оваа инфекција.
Руската Федерална служба за надзор на заштитата на правата на потрошувачите и благосостојбата на луѓето (Роспотребнадзор) соопшти дека официјалната дијагноза е пневмонија со неутврдена етиологија.
Според руските власти, досегашните проверки не покажале ширење на особено опасна инфекција, а епидемиолошката состојба во Иркутската област се оценува како стабилна.
Случајот го следат и американските власти. Американскиот Стејт департмент потврди дека Вашингтон е запознаен со извештаите за смртниот случај поврзан со сомнеж за белодробна чума во Иркутската област.
Од САД наведоа дека ситуацијата внимателно се следи во координација со Центарот за контрола и превенција на болести (ЦДЦ) и други американски институции. Истовремено, американските власти побарале од Русија брзо и транспарентно да ги објави точните информации, имајќи предвид дека голем дел од деталите за случајот сè уште не се потврдени.
Чумата е заразна болест предизвикана од бактеријата „Yersinia pestis“. Белодробната форма може да се пренесува меѓу луѓето преку респираторни капки, поради што се смета за сериозна форма на заболувањето.
Светската здравствена организација, сепак, оценува дека ризикот од меѓународно ширење на чумата вообичаено е низок.
