Одбележувањето на 35-годишнината од независноста на Македонија продолжува денеска во Вила Водно, каде претседателката Гордана Сиљановска-Давкова ќе организира прием за ученици кои постигнале значајни резултати на меѓународни научни натпревари.
На приемот ќе присуствуваат ученици од основните и средните училишта, како и нивните ментори, кои во текот на учебната 2025/2026 година учествувале на меѓународни научни олимпијади и натпревари.
Дел од учениците се вратија со медали, награди и признанија, претставувајќи ја Македонија на меѓународната сцена.
На настанот ќе присуствува и министерката за образование и наука Весна Јаневска, информираат од Кабинетот на претседателката.
Во рамките на програмата за одбележување на Денот на независноста, со почеток во 9 часот ќе се одржи и панел-дискусијата „8 Септември низ призма на негови непосредни учесници и сведоци“.
На панелот, покрај Сиљановска-Давкова, ќе учествуваат поранешни политичари и државни функционери, пратеници, новинари и други јавни личности кои биле непосредни учесници или сведоци на процесите поврзани со создавањето на независна Македонија.
Учесниците ќе ги споделат своите сведоштва и видувања за политичките, институционалните и општествените процеси што доведоа до прогласувањето на независноста на државата.
