Големи гужви и километарски колони се создаваат на граничниот премин Богородица–Евзони, а според информациите што ги пренесуваат српските медиуми, зголемениот сообраќаен притисок би можел да продолжи и во наредните денови.
Една од причините за големиот број возила е продолжениот празничен викенд во Македонија по повод 8 Септември – Денот на независноста. Голем број граѓани го користат неработниот ден за краток одмор во Грција, што дополнително ја зголемува фреквенцијата кон јужниот сосед.
Ситуацијата, според објавените информации, дополнително била отежната и поради прекин на електричната енергија во реонот на преминот Богородица–Евзони, што придонело за создавање долги редици.
Дополнителен проблем за патниците се високите температури. Поради жешкото време, на оние кои се упатуваат кон Грција им се препорачува во возилата да имаат доволно вода, особено доколку чекањето на границата се одолжи.
Возачите треба да бидат подготвени на зголемена фреквенција, да прават паузи доколку патуваат подолго време и строго да ги почитуваат сообраќајните правила.
Со оглед на продолжениот викенд и големиот интерес за патување кон Грција, можно е засилен сообраќај да има и во следните денови, особено во термините кога најголем број туристи тргнуваат или се враќаат од туристичките места.
За сите кои деновиве планираат пат кон Грција, препораката е јасна – проверете ја состојбата на границата пред поаѓање и подгответе се за можно подолго чекање.
