Православните христијани денес го одбележуваат Преносот на моштите на Светиот апостол Вартоломеј, еден од дванаесетте Христови апостоли, чиј живот и маченичка смрт останале трајно запишани во христијанската историја.
Според црковното предание, по неговото мачеништво во Албанопол, христијаните го положиле неговото тело во оловен ковчег. Поради многубројните чуда и исцеленија кои се случувале на неговиот гроб, ковчегот со моштите бил фрлен во морето, но не потонал, туку стигнал до Липарските острови.
Таму моштите биле пречекани од епископот Агатон, свештенството и верниот народ и биле положени во храм посветен на Свети Вартоломеј. Подоцна биле пренесени во Беневенто.
На денешен ден Црквата го споменува и Светиот апостол Тит, еден од Седумдесеттемина апостоли и ученик на Светиот апостол Павле, кој бил поставен за епископ на Крит.
Се чествуваат и Светите Едески Исповедници, кои претрпеле прогонства поради православната вера, како и Свети Мина, патријарх Цариградски, кој управувал со Црквата во VI век.
За верниците, денешниот празник е потсетување на силата на верата, истрајноста и духовното наследство оставено од светителите.
Нека е за многу години денешниот празник!
