На 22-годишниот српски државјанин Данило Џекулиќ му е одредено задржување до 72 часа во Подгорица, поради сомнение за обид за тешко убиство, недозволено поседување и носење оружје и фалсификување исправа.
Според црногорската полиција, Џекулиќ на 8 септември околу 12:30 часот влегол во угостителски објект во Будва, каде што наводно имал намера со пиштол да го убие Огњен Кажанегра. Во намерата бил спречен токму од Кажанегра, кој успеал да го совлада, по што била повикана полицијата.
Кај осомничениот бил пронајден пиштол „Smith & Wesson“ со куршум во цевката и уште 12 куршуми во рамката. Полицијата пронашла и лична карта на друго име, за која било утврдено дека е фалсификувана.
Порталот „Libertas Press“ објави снимка од спроведувањето на Џекулиќ на распит. На неа се гледа дека 22-годишникот го променил својот изглед – пуштил мустаќи и подолга коса. Според извор цитиран од српски „Курир“, се претпоставува дека тоа го направил за потешко да биде препознаен според фотографијата што претходно ја објавила полицијата додека трагала по него.
Со дополнителните проверки било утврдено дека по Џекулиќ е распишана и меѓународна потерница од Интерпол Белград од 29 јуни 2026 година. Тој се бара поради сомнение дека заедно со уште едно лице учествувал во тешко убиство извршено во Белград во јуни.
Српските медиуми го поврзуваат со убиството на Дарко Весковиќ – Прика во белградската населба Кумодраж. Според сомневањата, Џекулиќ по ликвидацијата го одвезол осомничениот извршител со мотор, по што двајцата побегнале од Србија.
Во медиумските извештаи се наведува и дека во телефонот на Џекулиќ наводно биле пронајдени фотографии од Огњен Кажанегра и неговиот брат Младен. Црногорските медиуми објавија дека тој наводно требало да му пренесе „поздрав од Врачар“, што истражителите го поврзуваат со криминалното подземје. Овие детали, сепак, се медиумски наводи.
