Граѓанската иницијатива „Иницијатива за безбедно детство“, составена од родители, едукатори и експерти, повикува на итни мерки за заштита на децата од негативните ефекти на дигиталниот свет. Според нив, современите социјални мрежи, иако нудат можност за учење и поврзување, се дизајнирани како „машини за внимание“, при што профитот често се става пред менталното здравје на најмладите.
Иницијативата посочува дека прекумерната употреба на дигитални платформи кај децата и тинејџерите се поврзува со сериозни проблеми:
- Нарушено ментално здравје: анксиозност, депресија и намалена самодоверба.
- Дигитално насилство: зголемено присуство на cyberbullying и врсничко насилство.
- Опасни трендови: ширење на ризични „предизвици“ и несоодветни содржини.
- Губење на фокусот: намален интерес за учење и пад на академските резултати.
„Не се работи за борба против технологијата, туку за правото на децата да растат во безбедна и здрава средина, ослободена од предаторски алгоритми“, нагласуваат од иницијативата.
Тие повикуваат Македонија да го следи примерот на земји како Австралија, Франција и Словенија, кои веќе воведуваат мерки за заштита на децата. Меѓу предлозите се:
- Целосна забрана за користење на социјални мрежи за деца под 12 години.
- Строга регулација за корисници од 13 до 16 години, со родителска согласност и верификација на возраст.
- Одговорност од платформите: ограничување на штетни содржини и заштита на личните податоци.
- Државен надзор: санкции за непочитување на правилата и национална програма за дигитална писменост.
Сите кои ја поддржуваат иницијативата можат да се потпишат на петицијата за законски измени, со цел платформите и институциите да го стават безбедното детство на прво место пред профитот.
