Жичницата на Водно нема да биде пуштена во употреба во текот на целата летна сезона, откако вонредните технички контроли открија сериозни проблеми и долгогодишни пропусти во одржувањето, кои според надлежните можеле да создадат и опасни ситуации за патниците.
Градоначалникот на Скопје, Орце Ѓорѓиевски, соопшти дека при деталниот увид било утврдено оти системот со години не бил одржуван според неопходните стандарди, а најзагрижувачки е фактот што жичницата цели 15 години не поминала целосен сервис од страна на австрискиот производител „Допелмаер“.
По иницијатива за темелна проверка, на терен пристигнале специјализирани експерти од компанијата, кои потврдиле дека клучните сервисни интервенции што требало редовно да се спроведуваат биле сериозно занемарени.
Иако во минатото постоеле барања и понуди поврзани со одржување, тие, според информациите, никогаш не биле претворени во конкретен договор за целосен сервис.
Техничките наоди покажале дека дел од гумените компоненти биле значително истрошени, што предизвикувало несоодветно триење при движењето на кабините, а дополнителна загриженост предизвикале и нефункционалните безбедносни сензори.
Токму овие дефекти, според стручните проценки, можеле да доведат до сериозни безбедносни ризици, вклучително и потенцијална можност за откачување на кабина.
Жичницата првично беше затворена на 25 април со очекување дека прекинот ќе биде краткотраен, но по деталната контрола од австрискиот тим било донесено решение системот да не биде повторно активиран додека не се реализира комплетен сервис и санација.
Од ЈСП „Скопје“ посочуваат дека сè уште се очекува официјална понуда од „Допелмаер“ за точниот обем на потребните работи и финансиската конструкција, но веќе е јасно дека процесот ќе биде долг.
Тоа практично значи дека една од најпосетуваните туристички и рекреативни атракции во Скопје ова лето ќе остане недостапна за граѓаните и туристите, сè додека не се обезбеди целосна техничка сигурност.
