Крузерот „MV Hondius“, на кој беа потврдени смртни случаи поврзани со хантавирус, се очекува утре рано наутро да пристигне на шпанскиот остров Тенерифе, што предизвика обемни подготовки и засилени безбедносно-здравствени мерки на европско и меѓународно ниво.
Операторот на бродот соопшти дека во тек се детални подготовки за прием на пловилото, кои вклучуваат карантински процедури, медицински проверки на сите патници и членови на екипажот, како и организација на нивните понатамошни патувања.
Во целиот процес се вклучени повеќе институции од различни држави, меѓу кои Светската здравствена организација (СЗО) и холандските власти, додека тесна координација се одвива и со шпанските надлежни служби.
Според најновите информации, на бродот кој плови под холандско знаме и превезува 147 патници, од четврток наваму не се регистрирани нови сомнителни случаи. Сепак, здравствените експерти предупредуваат дека ризикот сè уште постои, бидејќи инкубацискиот период на хантавирусот може да трае и до шест недели, што значи дека симптомите може да се појават и подоцна.
По пристигнувањето во пристаништето Гранадиља на Тенерифе, шпанските здравствени власти ќе ја преземат целосната контрола врз медицинските процедури, тестирањето и евентуалната изолација на патниците. Во зависност од резултатите, ќе се организира и нивно враќање во матичните земји.
Соединетите Американски Држави веќе најавија дека ќе организираат специјални летови за евакуација на своите државјани, со цел нивно безбедно враќање.
Од избувнувањето на заразата, која започна на 1 април по испловувањето на бродот од јужна Аргентина, досега се потврдени три смртни случаи – брачен пар од Холандија и една жена од Германија.
Светската здравствена организација претходно потврди шест лабораториски случаи и нагласи дека и покрај сериозноста на ситуацијата, ризикот за глобално ширење останува многу низок, бидејќи вирусот не се пренесува лесно кај општата популација.
Генералниот директор на СЗО, Тедрос Аданом Гебрејесус, најави лично присуство на Канарските Острови за координација на кризата, заедно со шпанските министри за здравство и внатрешни работи, со цел да се обезбеди строго спроведување на сите протоколи за биосигурност и заштита на јавното здравје.
