Украинскиот претседател Володимир Зеленски соопшти дека Украина и Русија постигнале договор за тридневно примирје, како и за размена на вкупно илјада воени заробеници, што претставува еден од ретките конкретни дипломатски поместувања во тековниот конфликт.
Во својата објава на платформата Икс, Зеленски наведе дека прекинот на огнот треба да биде воспоставен во периодот од 9 до 11 мај, нагласувајќи дека Украина активно работи на враќање на своите граѓани кои се наоѓаат во руско заробеништво.
Тој исто така изрази благодарност до американскиот претседател Доналд Трамп и неговиот тим, оценувајќи дека нивниот дипломатски ангажман бил значаен во процесот на постигнување на договорот.
Зеленски додаде дека Украина очекува САД да продолжат со притисокот врз руската страна за целосно почитување на постигнатите договори и нивно спроведување во пракса.
Претходно, Доналд Трамп на својата социјална мрежа „Трут соушл“ објави дека, на негово барање, двете страни се согласиле на тридневно примирје и размена на илјада воени заробеници.
Трамп во својата објава изрази надеж дека овој договор може да претставува почеток на крајот на, како што го опиша, „долга, смртоносна и тешка војна“, додавајќи дека во преговорите е постигнат одреден напредок кон можен завршеток на конфликтот.
