Британската телевизиска јавност ја потресе веста за смртта на познатиот водител и градежен експерт Томи Волш, кој почина на 69-годишна возраст по долга и тешка борба со болеста.
Информацијата за неговата смрт ја потврди неговата агентка Деби Шисер. Таа соопшти дека Волш починал мирно, опкружен со најблиските членови на семејството. Неговите роднини упатија апел до јавноста и медиумите да ја почитуваат нивната приватност во овој тежок период.
Веста за неговото заминување првично ја објави аматерскиот фудбалски клуб „Old Parmiterians FC“ од источен Лондон. Волш со години бил дел од клубот и со голем ентузијазам настапувал на голманската позиција.
Од градежен бизнис до телевизиска кариера
Томи Волш е роден на 18 декември 1956 година во Хакни, Лондон. Неговиот животен пат бил исполнет со успеси, а пошироката јавност го запозна преку телевизиските емисии посветени на уредувањето на домовите и градините.
Пред да стане телевизиска ѕвезда, Волш со години успешно водел сопствен градежен бизнис. Неговиот влез во светот на телевизијата се случил сосема неочекувано.
Додека извршувал градежни работи на имотот на позната телевизиска продуцентка, добил повик за аудиција. Таа можност се покажала како пресвртница во неговиот живот и го однела на патот кон големата телевизиска популарност.
„Ground Force“ му донесе слава и милиони гледачи
Најголемата популарност ја стекна како едно од препознатливите лица на британската телевизиска емисија „Ground Force“, која се емитуваше на Би-Би-Си од 1997 до 2005 година.
Волш беше дел од тимот заедно со Алан Тичарш и Чарли Димок, а неговата задача беше да ги реализира најсложените градежни зафати при преуредувањето на градините.
Изработката на дрвени тераси, ѕидови и водени површини беа само дел од проектите во кои учествуваше. Емисијата постигна огромен успех, а во периодот на најголема гледаност привлекувала дури 12 милиони гледачи.
По завршувањето на „Ground Force“, Волш продолжи да работи на телевизиски проекти поврзани со реновирањето, уредувањето и подобрувањето на домовите.
Меѓу емисиите во кои учествуваше се „Homes Under The Hammer“, „Clean It, Fix It“, „Challenge Tommy Walsh“ и „Flip That House“.
Покрај телевизиската кариера, тој беше и автор на повеќе практични книги посветени на самостојните поправки и работите во домаќинството.
Со своето долгогодишно искуство во градежништвото и препознатливиот телевизиски настап, Томи Волш остави белег во британските емисии за домот и градината.
