По големиот воздушен напад на Русија врз Украина, Полска привремено затвори два аеродрома – во Лублин и Жешов – и крена борбени авиони, соопшти полската војска. Аеродромите беа повторно отворени по завршувањето на операцијата.
Претседателот Володимир Зеленски соопшти дека Русија лансирала повеќе од 400 дронови и околу 40 проектили од различен тип. Мета на нападот биле електричната мрежа, производствените постројки и дистрибутивните трафостаници, а полската страна потврди дека не е нарушен нејзиниот воздушен простор.
Министерот за енергетика на Украина, Денис Шмихал, истакна дека нападот погодил две термоелектрани и клучни елементи за дистрибуција на електрична енергија, во услови на најавени температури до -19 степени во наредните денови.
Зеленски потенцираше дека Русија продолжува да избира војна наместо дипломатија и повика на засилена поддршка за трилатералните преговори и спречување на нови напади.
