Уставниот суд на Чешка пресуди дека лицата што доброволно нудат сексуални услуги за пари мора да плаќаат данок на приходите што ги остваруваат. Во образложението е наведено дека доброволната проституција не претставува кривично дело, за разлика од подведувањето и посредувањето во проституција, поради што заработката од таквата дејност подлежи на оданочување, објавуваат локалните медиуми.
Одлуката е донесена по повеќегодишен судски спор со жена која се занимавала со проституција и одбила да плати дополнително пресметан данок за приходите остварени во 2013 и 2014 година. Таа го оспорила барањето на даночните власти, а потоа се обратила и до Уставниот суд, тврдејќи дека со наплатата на данокот државата практично би се ставила во улога на макро, што според чешките закони е кривично дело.
Случајот започнал откако даночните власти забележале дека жената менува евра во чешки круни и ги уплаќа парите на својата банкарска сметка. Кога била прашана за потеклото на средствата, таа објаснила дека парите ги заработила од проституција. Сепак, сметала дека приходите од оваа активност не треба да бидат предмет на оданочување.
Во текот на судската постапка, жената навела и дека политичари во минатото повремено изјавувале оти доброволната проституција не подлежи на данок. Поради таквите изјави, очекувала дека нема да има обврска да ја пријави и оданочи заработката.
Уставниот суд, сепак, ја отфрлил нејзината жалба. Во образложението било посочено дека државата ги оданочува остварените приходи и зголемувањето на имотот, без оглед на тоа дали дејноста од која потекнуваат средствата е општествено прифатлива.
„Оданочувањето не значи морално одобрување на одредена дејност, ниту дека државата ја признава таа дејност“, се наведува во образложението на судот.
Судијата направил споредба меѓу приходите од доброволно нудење сексуални услуги и заработката на лицата што работат во други слободни професии, како уметници, спортисти и манекени.
Според ставот на судот, целта на даночниот систем е даночниот товар да се распределува праведно, врз основа на остварените приходи. Оданочувањето на законски остварената заработка од сексуалната индустрија, како што е наведено во образложението, може долгорочно да придонесе и за подобрување на општествената положба на луѓето што работат во оваа дејност.
Со оваа одлука, Уставниот суд потврди дека фактот што одредена активност може да предизвикува морални или општествени несогласувања сам по себе не претставува основа приходите од неа да бидат ослободени од данок, доколку тие се законски остварени.
