Претседателот на Владата, Христијан Мицкоски, и министерот за здравство, Сашо Клековски, денеска присуствуваа на настанот по повод официјалната промоција и предавање на 100 нови, комплетно опремени амбулантни возила наменети за Итната медицинска помош во јавните здравствени установи низ целата држава.
Станува збор за значајно засилување на возниот парк и капитална инвестиција која директно ќе ја подобри брзината, ефикасноста и квалитетот на здравствената заштита при итни случаи.
Врвна медицинска и техничка опрема
Новите возила се опремени по сите светски и европски стандарди со цел да овозможат моментална реанимација и безбеден транспорт на сите категории пациенти. Меѓу вградената опрема се издвојуваат:
- Напреден дефибрилатор и монитор за континуирано следење на виталните параметри;
- Кислородна и респираторна опрема прилагодена за сите возрасти – возрасни, деца и новороденчиња;
- Автоматска носилка и специјален хидрауличен систем за намалување на вибрациите при транспорт на тешко повредени пациенти;
- Интегриран систем за озонска дезинфекција кој обезбедува максимална стерилност во возилото;
- Современи системи за активна безбедност кои овозможуваат сигурно и брзо движење на возилата на терен.
Со оваа голема набавка значително се подобруваат условите за работа на медицинските тимови, а граѓаните од сите региони во државата добиваат побрза и подобро опремена Итна медицинска помош.
