Романија се подготвува да добие еден од најамбициозните туристички проекти во Европа – првиот и најголем тематски парк во светот целосно посветен на легендата за Дракула. Проектот, вреден повеќе од една милијарда евра, треба да биде изграден во близина на Букурешт, на помалку од 30 минути од центарот на градот и во непосредна близина на меѓународниот аеродром Отопени.
Паркот, познат како „Дракула Ленд“, ќе понуди целосно имерзивно искуство преку шест тематски целини и повеќе од 40 атракции, наменети за посетители од сите возрасти. Главната идеја е да се спојат митологијата, авантурата, забавата и современата технологија, создавајќи нова европска туристичка икона.
Централно место во паркот ќе има замокот на Дракула – масивна градба опкружена со шума, езеро, урнатини и лавиринти, инспирирана од трансилванските легенди. Во оваа зона ќе се наоѓа и специјалната атракција „ролеркостер со лилјаци“, која треба да биде една од главните адреналински понуди. Трансилваниската зона ќе вклучува и традиционално село, тематски патеки и ролеркостери со вампирска приказна.
Другите тематски светови ќе бидат насочени кон семејна забава, фантазија и натприродни суштества од различни светски митологии, со интерактивни содржини и визуелни ефекти.
Но „Дракула Ленд“ нема да биде само тематски парк. Проектот предвидува и изградба на голема арена со 22.500 седишта за концерти, фестивали и е-спорт настани, луксузен аутлет-центар со повеќе од 70 светски брендови, како и три хотели со вкупно околу 1.200 соби.
Дополнително, комплексот ќе содржи воден парк и термален спа-центар на површина од 50.000 квадратни метри со над 30 водени атракции, тркачка патека за мотоспорт долга 4,5 километри, како и технолошки и иновативен центар поврзан со дигитални индустрии и стартапи.
Според официјалните информации, проектот треба да отвори повеќе од 5.000 директни и индиректни работни места во туризмот, услугите и технологијата, додека вкупниот економски ефект во следните десет години се проценува на околу пет милијарди евра.
Отворањето на „Дракула Ленд“ е планирано најрано за 2027 година, а цените на билетите засега не се објавени. Основачот на проектот, Драгош Добреску, вели дека ова не е само бизнис-идеја, туку национален симбол.
„За мене, Земјата на Дракула е национален проект – доказ дека Романија може да создава обележја кои ќе ја позиционираат на светската туристичка мапа“, изјави Добреску.
