Македонскиот каратист Марко Џорлев освои златен медал на престижната Карате 1 Младинска лига во Пореч, Хрватска, откако триумфираше во категоријата до 63 килограми во кадетска конкуренција.
Во големото финале Џорлев го совлада Украинецот Иван Маценко со 4-3 и го освои најсјајното одличје.
До златото, младиот македонски каратист стигна со шест последователни победи. На патот до финалето беше подобар од претставници на Португалија, Германија, Словачка, Србија и Италија, а победничката серија ја заокружи со триумф во финалниот меч.
Со овој успех, Џорлев уште еднаш потврди дека припаѓа меѓу најдобрите млади каратисти во светот.
На годинашното издание на Карате 1 Младинската лига настапија 2.720 каратисти со 2.765 натпреварувачки настапи од дури 69 држави. 🇲🇰🥋
