Пентагон објави нова серија декласифицирани материјали поврзани со неидентификувани аномални појави (UAP), попознати во јавноста како НЛО. Во пакетот се вклучени документи, видеоснимки и аудиоматеријали од различни американски институции.
Станува збор за вкупно 71 датотека – 55 PDF-документи, 15 видеоснимки и една аудиоснимка. Најголемиот дел од материјалите потекнуваат од американското Министерство за одбрана, додека дел се добиени од локалната полиција во Колорадо.
Меѓу објавените документи има и материјали поврзани со програмата AAWSAP, започната во 2008 година, во чии рамки биле разгледувани различни футуристички концепти, меѓу кои „warp“ погон, црвоточини, антигравитација, негативна маса и технологии за невидливост.
Сепак, од Пентагон нагласуваат дека постоењето на вакви анализи не е доказ дека технологиите навистина постојат или дека функционираат.
Посебно внимание привлекува студија од 2010 година во која се разгледуваат пријави на лица кои тврделе дека имале здравствени проблеми по наводни средби со необични воздушни појави. Кај три лица биле наведени симптоми како силно чувство на топлина, црвенило на кожата и опаѓање на косата, а кај едно лице биле опишани знаци слични на изложеност на радијација. Во документот не е утврдено што ги предизвикало симптомите.
Објавени се и нови снимки направени со воени камери. На една снимка од 2022 година се гледа неидентификуван објект кој, според извештајот, се движел со брзина од приближно 130 до 290 километри на час над Блискиот Исток.
На друга снимка се забележуваат околу шест мали сферични објекти кои се движат во формација и го менуваат правецот на движење. Случајот останал необјаснет.
Во пакетот се вклучени и постари материјали. Во аудиоснимка од 1952 година, офицерот на американското воздухопловство Едвард Рупел зборува за стотици анализирани пријави и наведува дека околу 20 проценти од приближно 800 случаи во тоа време не можеле да бидат објаснети.
Американските власти потенцираат дека класификацијата „необјаснето“ не значи дека станува збор за вонземски летала. Таа означува дека достапните информации не биле доволни за сигурно да се утврди природата на забележаниот феномен.
Видео:
