Корисниците на Viber во Србија наскоро ќе добијат можност да испраќаат и примаат пари директно преку апликацијата за комуникација, без притоа да плаќаат надоместок за трансакцијата.
Новата функционалност била најавена на 16 септември, а според плановите, треба да биде достапна за корисниците во Србија во рок од следните 30 дена.
Решението е развиено преку соработка на Viber со Народната банка на Србија и компанијата PayChat. Целта е процесот на префрлање пари да биде поедноставен и да се одвива директно во рамките на секојдневната комуникација.
За да ја активираат услугата, корисниците ќе треба да го поврзат соодветниот chatbot со својата апликација за мобилно банкарство.
Откако ќе биде воспоставена врската, корисникот преку Viber ќе може да го избере лицето на кое сака да му испрати пари и да го внесе износот.
Сепак, конечната потврда на трансакцијата нема да се врши директно во четот. За завршување на плаќањето ќе биде потребно корисникот да ја потврди трансакцијата преку својата апликација за мобилно банкарство.
На овој начин, Viber го преместува почетниот дел од процесот на трансфер на пари во разговорот меѓу корисниците. Наместо рачно да ги внесува податоците за примачот во банкарската апликација, корисникот ќе може да започне со испраќањето директно од четот.
Новата опција засега е најавена за корисниците во Србија, а трансферите според најавата ќе бидат бесплатни.
