Научници од рускиот Центар за вирусологија „Вектор“, во соработка со истражувачи од Централносибирската ботаничка градина, развиле екстракт од растението Artemisia obtusifolia кој во лабораториски услови покажал антивирусно дејство против два подтипа на вирусот на грип А.
Станува збор за A/H3N2 и A/H5N1, а истражувачите сметаат дека резултатите отвораат можност за понатамошно испитување на растението како потенцијален извор на нови антивирусни соединенија.
За добивање на екстрактот биле користени надземни и подземни делови од растението. По процесот на екстракција, добиените раствори биле концентрирани и сушени, со што бил произведен сув екстракт.
Според објавените информации, тестирани биле водни и етанолни екстракти. Во експериментите на клеточни култури тие покажале релативно ниска токсичност за клетките и способност да го потиснат размножувањето на испитуваните вируси.
Истражувачите ги споредувале резултатите и со оселтамивир фосфат, познат антивирусен лек што се користи против грип. Тестирањето било изведено под исти лабораториски услови и врз истите вирусни соеви.
Како особено интересни се издвоиле водните екстракти, кои според истражувачите покажале најизразено дејство против A/H5N1.
За откритието е пријавен и патент, а авторите наведуваат дека потенцијално би можело да придонесе кон развојот на нови антивирусни средства.
Сепак, резултатите не значат дека обичниот пелин претставува докажан лек против грип. Станува збор за лабораториски истражувања на конкретен екстракт од Artemisia obtusifolia, а за евентуална медицинска примена би биле потребни дополнителни испитувања за безбедноста, дозирањето и ефикасноста кај луѓе.
