Превентивните програми за рано откривање на ракот, организацијата на скрининг-прегледите и интегрираниот пристап кон онколошките пациенти беа во фокусот на посетата на Онколошкиот институт во Љубљана – водечката национална установа во Словенија за дијагностика, лекување, истражување и превенција на малигните заболувања.
Овој реномиран институт со речиси 90-годишна традиција функционира како независна установа која на едно место ги обединува сите клучни сегменти во борбата против ракот:
- Дијагностика и мултидисциплинарно лекување: Целосна интеграција на хирургијата, радиотерапијата и системската терапија.
- Наука и едукација: Постојана научноистражувачка и едукативна дејност.
- Национален регистар: Водење на официјалниот Регистар за рак на Словенија.
- Превенција: Директно управување со националните скрининг-програми.
За време на посетата, посебен акцент беше ставен врз словенечките превентивни програми, кои важат за еден од најуспешните модели во регионот:
- СВИТ: Програма за рано откривање на рак на дебелото црево (водење од нивниот Институт за јавно здравје).
- ЗОРА: Програма за рано откривање на промени на грлото на матката, со постепен премин кон ХПВ-тестирање.
- ДОРА: Мамографски скрининг за рано откривање на рак на дојка.
- ЛУКА и ПЕТЕР: Иновативни пилот-проекти насочени кон рано откривање на рак на белите дробови и рак на простата.
Словенечкото искуство потврдува дека превентивните програми даваат врвни резултати кога се системски организирани – со испраќање лични покани до граѓаните, строга контрола на квалитетот и континуирано следење на резултатите на национално ниво.
Овие позитивни практики и искуства ќе бидат искористени за унапредување и подобрување на превентивните програми во нашата земја. Во рамки на средбата со раководството и тимот на Институтот во Љубљана беше договорена и идна соработка, која ги опфаќа и можностите за добивање второ медицинско мислење за пациентите.
