Бубрег од генетски модифицирана свиња, пресаден кај американски пациент, функционирал рекордни 271 ден, што претставува најдолг досега забележан период на функционирање на ваков трансплантиран орган.
Примателот, Тим Ендрјус, вели дека постапката му дала нова надеж и му овозможила со месеци да биде ослободен од дијализа.
Ксенотрансплантацијата – пресадување органи од животни кај луѓе – се истражува како потенцијално решение за хроничниот недостиг на човечки органи. Само во САД околу 100.000 луѓе чекаат бубрег, додека годишно се извршуваат околу 25.000 трансплантации.
На Ендрјус му било кажано дека за човечки бубрег би можел да чека и до седум години.
„Најважна е надежта. Тоа е шанса да се симнете од машината и да го живеете својот живот“, изјавил тој.
Во почетниот период лекарите забележале знаци дека организмот го отфрла органот, но состојбата била ставена под контрола со приспособување на терапијата. По околу шест месеци, сепак, крвните садови во бубрегот почнале да се влошуваат, се појавило воспаление и органот постепено ја губел функцијата.
По 271 ден со свинскиот бубрег, Ендрјус повторно минал 82 дена на дијализа. Во јануари годинава успешно му бил пресаден човечки бубрег, кој според објавените информации продолжува нормално да функционира.
Свињите се сметаат за едни од најсоодветните животни за ваков тип трансплантација поради големината на нивните органи. За да се намали ризикот човечкиот имунолошки систем веднаш да го нападне органот, научниците користат свињи со бројни генетски модификации.
Лекарите оценуваат дека случајот истовремено го покажува огромниот потенцијал, но и предизвиците на ксенотрансплантацијата, која во иднина би можела да стане важна опција за пациентите што со години чекаат човечки орган.
