Вештачката интелигенција веќе прави значителни промени во здравствениот сектор, а најновите податоци покажуваат дека медицинските работници заштедуваат цели недели работа благодарение на нејзината примена.
Според глобалниот извештај „Future Health Index 2026“, изработен од компанијата „Филипс“, речиси половина од здравствените професионалци изјавиле дека со користење AI алатки заштедуваат најмалку 132 часа годишно на административни задачи. Тоа е еквивалент на повеќе од три работни недели.
Најголема корист имаат медицинските сестри, кои сè почесто користат системи за автоматско внесување податоци, пишување белешки и обработка на документација. Така, наместо на бирократија, можат повеќе време да посветат на пациентите.
Вештачката интелигенција се користи и за анализа на медицински снимки, проверка на терапија и откривање потенцијални грешки. Дури 39 проценти од испитаниците изјавиле дека AI помогнал да се спречи можна медицинска грешка во последните неколку месеци.
Истражувањето покажува и дека 65 проценти од лекарите чувствуваат поголема сигурност при донесување одлуки кога користат вакви алатки.
Сепак, извештајот предупредува и на предизвици. Поради бавната имплементација во болниците, голем дел од здравствените работници користат приватни AI алатки на работното место, што отвора прашања за безбедноста на податоците и приватноста на пациентите.
Експертите сметаат дека иднината на здравството ќе биде тесно поврзана со вештачката интелигенција, но предупредуваат дека нејзината примена мора да биде проследена со јасни правила, обука и соодветна заштита на чувствителните информации.
