Основното јавно обвинителство Штип поведе постапка против двајца вработени на Универзитетот „Гоце Делчев“, осомничени за незаконски интервенции во електронските индекси на студентите, со кои наводно стекнале материјална корист од околу 21.000 евра.
Станува збор за раководител на Секторот за „Е-Индекс“ и референтка за студентски прашања на еден од факултетите.
Според Обвинителството, осомничените во периодот од 2021 до 2026 година ја злоупотребувале службената положба за да менуваат, бришат и прикриваат информации во универзитетскиот информатички систем.
Како функционирала наводната шема?
Според сомнежите, раководителот ѝ давал насоки на референтката да внесува невистинити податоци во електронските индекси, со што се создавале неточни резултати при обработката на студентските информации.
За ваквите интервенции, според досегашните сознанија на истрагата, двајцата стекнале противправна материјална корист проценета на 21.000 евра.
Обвинителството ги товари за злоупотреба на службената положба и овластување и компјутерска измама.
Побаран притвор за двајцата
Надлежниот јавен обвинител доставил предлог до судијата на претходна постапка за определување притвор за двајцата осомничени.
Претходно, полицијата спроведе претреси на повеќе локации во Штип и Скопје, во рамки на истрагата за незаконските интервенции во студентскиот систем.
Засега не е соопштено колку студентски досиеја биле опфатени, дали биле менувани оценки или положени испити, ниту колку студенти евентуално имале корист од манипулациите.
Истрагата продолжува, а осомничените се сметаат за невини сè до евентуална правосилна осудителна пресуда.
