На територијата на Македонија во текот на денешниот ден до 19 часот биле евидентирани вкупно 10 пожари на отворен простор, од кои три и понатаму се активни, додека останатите седум се целосно локализирани и изгаснати.
Според информациите од Центарот за управување со кризи (ЦУК), активен пожар има во општина Желино, во близина на селото Горна Лешница, каде што огнот зафатил сува трева и мешана шума.
Вториот активен пожар е на подрачјето на општина Валандово, кај селото Удово покрај реката Вардар, каде што гори ниска вегетација.
Третото активно жариште е во општина Долнени, меѓу селата Црнилиште и Стровија, каде што пламените јазици зафатиле сува трева и отпад.
Од ЦУК информираат дека сите останати пожари што избувнале во текот на денот се успешно изгаснати. Интервенции биле извршени во општините Долнени, Кавадарци, Кичево, Делчево и Желино, како и на две локации во гостиварскиот регион.
