Керчкиот мост, кој ги поврзува Русија и окупираниот Крим, ноќеска бил привремено затворен поради напад со беспилотни летала и серија експлозии што биле регистрирани во повеќе делови на полуостровот.
Според руските власти, сообраќајот преку мостот бил запрен кратко по полноќ, откако жителите на Симферопол и Севастопол пријавиле силни детонации. Гувернерот на Севастопол, Михаил Развожаев, изјави дека руската противвоздушна одбрана и мобилните единици успешно одбиле напад со дронови, при што биле соборени пет беспилотни летала во областа Балаклава.
По нешто повеќе од два часа, властите соопштиле дека сообраќајот преку Керчкиот мост повторно е нормализиран.
Нападот доаѓа во период на засилени украински операции насочени кон воената логистика и енергетската инфраструктура на окупираниот Крим. Според украинските Сили за беспилотни системи, во периодот од 1 до 27 јули биле погодени 154 енергетски објекти на Крим и на другите окупирани украински територии.
Украинската страна тврди дека само меѓу 25 и 27 јули биле извршени напади врз 18 енергетски објекти, од кои 14 се наоѓале на Крим, а четири на други окупирани подрачја. Засега украинските власти официјално не го коментираа најновиот напад врз полуостровот.
