Корисниците на Андроид повторно се предупредуваат да внимаваат какви апликации инсталираат на своите телефони, откако безбедносни истражувачи откриле серија сомнителни апликации кои ветувале пристап до туѓи повици, СМС-пораки и историја на комуникација.
Станува збор за апликации поврзани со името „КалФон“, кои, според истражувањето на компанијата ЕСЕТ, функционирале како измама. Иако на корисниците им ветувале дека ќе можат да откријат приватни податоци поврзани со одреден телефонски број, по плаќањето тие добивале лажни информации.
Принципот бил едноставен – корисникот внесувал телефонски број, плаќал за наводно „отклучување“ на податоците, по што апликацијата прикажувала резултати кои не биле автентични.
Дополнителен проблем е што дел од апликациите биле достапни преку официјалната продавница Гугл Плеј, што кај корисниците можело да создаде впечаток дека се безбедни и проверени.
Некои од нив го користеле официјалниот систем за наплата на Гугл Плеј, додека други ги пренасочувале корисниците кон надворешни сервиси или формулари за плаќање. Во одредени случаи биле користени и обманувачки известувања кои прикажувале наводни резултати за историјата на повици со цел корисникот дополнително да биде поттикнат да плати.
ЕСЕТ пријавил 28 сомнителни апликации до Гугл, по што тие биле отстранети од продавницата.
Случајот е уште едно предупредување дека самото присуство на една апликација во официјална продавница не значи дека корисниците треба автоматски да ѝ веруваат. Особено сомнителни треба да бидат апликациите што ветуваат пристап до приватни пораки, повици или комуникација на други лица.
На корисниците им се препорачува внимателно да ги проверуваат програмерите, оценките, коментарите и дозволите што ги бара апликацијата, како и да избегнуваат плаќање за услуги кои ветуваат пристап до туѓи приватни податоци.
