Српската пејачка Јелена Карлеуша повторно се најде во центарот на вниманието, откако против неа и поранешната генерална директорка на Радио-телевизија Србија (РТС), Мања Грчиќ, беше поднесена кривична пријава.
Пријавата ја поднело здружението на граѓани „Еко стража“ до Посебното одделение за борба против корупцијата при Вишото јавно обвинителство во Белград.
Причина за ваквиот потег е приватна преписка што Карлеуша самата ја објавила на социјалната мрежа Икс на 9 ноември.
Во пораките, пејачката барала од тогашната директорка на РТС да му даде шанса за вработување на Вукашин Катиќ, кој конкурирал за работно место во јавниот сервис.
Особено внимание привлекол делот во кој Карлеуша ветува голема противуслуга доколку му биде помогнато на кандидатот. Во истата комуникација навела и дека сите кандидати имаат некаква врска.
Од здружението сметаат дека ваквата комуникација треба да биде предмет на истрага, поради сомневања за можни кривични дела поврзани со корупција, трговија со влијание и злоупотреба на службената положба.
Целиот случај излегол во јавноста откако Карлеуша јавно го прозвала Катиќ, тврдејќи дека со години му помагала финансиски и професионално, а тој не покажал благодарност.
„Го молев РТС да го вработи. Најмалку што требаше да напише беше благодарам“, порача пејачката.
Здружението побарало обвинителството да ја обезбеди целосната преписка и документацијата од конкурсот за вработување.
Поднесувањето кривична пријава не значи дека е утврдена вина, а надлежните институции треба да одлучат за понатамошното постапување.
