Кај едни автомобили капачето за гориво се наоѓа од левата, а кај други од десната страна. Иако на прв поглед изгледа како произволна одлука на производителот, зад позицијата стојат повеќе инженерски и практични причини.
Еден од факторите е распоредот на компонентите под автомобилот. Издувниот систем достигнува високи температури, па при конструирањето се настојува системот за полнење гориво да биде соодветно оддалечен од извори на топлина и други компоненти.
Важна е и безбедноста. Во ситуации кога автомобилот ќе остане без гориво и мора да се дополнува од канистер покрај пат, попрактично е возачот да се наоѓа на страната подалеку од сообраќајот. Сепак, ова не претставува универзално правило според кое може да се одреди страната кај секој автомобил.
Дополнително, производителите мора да ги почитуваат безбедносните барања за поставување на резервоарот, неговата заштита при судир и оддалеченоста од издувниот систем и електричните компоненти.
Голема улога има и платформата на која е конструиран автомобилот. Производителите често користат иста основа за повеќе модели и за различни пазари. Преместувањето на резервоарот, цевките и отворот за гориво за секоја земја би ја усложнило и поскапело конструкцијата, па позицијата најчесто останува иста без оглед на тоа каде автомобилот се продава.
Затоа не постои едноставно правило дека европските автомобили мора да го имаат отворот од една, а јапонските од друга страна.
Сепак, постои едноставен трик со кој возачот може веднаш да провери каде се наоѓа капачето без да излегува од автомобилот. Кај многу возила, покрај симболот за бензинска пумпа на инструмент-таблата има мала стрелка. Ако покажува налево, отворот е од левата страна, а ако покажува надесно – од десната.
