Високите летни температури не се предизвик само за луѓето, туку и за собните растенија, кои во периоди на екстремни горештини полесно ја губат влагата, венат и го забавуваат растот.
Еден едноставен начин да им помогнете е да направите „бања“ од камчиња (грагор) и вода, со што ќе ја зголемите влажноста на воздухот околу растението без да го изложите коренот на прекумерна влага.
Потребно е во плиток сад да распоредите слој камчиња висок околу два до три сантиметри, а потоа да додадете вода така што нејзиното ниво ќе остане под врвот на камчињата. Саксијата се поставува врз камчињата, при што е важно дното на саксијата да не ја допира водата, за да се избегне скапување на коренот.
Со испарувањето на водата се создава повлажна микроклима околу листовите, што им помага на растенијата полесно да ги издржат високите температури и да ја задржат свежината.
Овој метод особено им одговара на растенија кои природно потекнуваат од тропски и суптропски предели, како што се филодендрон, спатифилум, калатеа, маранта, алоказија, папрати, фитонија, дифенбахија и голем број орхидеи.
Од друга страна, кактусите и сукулентите не бараат висока влажност на воздухот, па ваквиот начин на одржување нема значително да им користи.
