Еден од најголемите фудбалери на сите времиња, Кристијано Роналдо, започнува ново поглавје во својата кариера, овојпат во филмската и телевизиската индустрија.
Португалската суперѕвезда официјално објави дека започнала продукцијата на неговата прва телевизиска серија, насловена „Day 1s“.
Проектот се реализира преку продукциската компанија „UR Marv Studios“, која Роналдо ја основа во 2025 година заедно со познатиот британски режисер и продуцент Метју Вон, кој стои зад филмовите „Kingsman“ и „Kick-Ass“.
„Нова возбудлива авантура! Тукушто започна продукцијата на мојата прва телевизиска серија, Day 1s. Наскоро следуваат повеќе информации“, напиша Роналдо на социјалните мрежи.
Серијата ќе ја прикаже помалку познатата страна на професионалниот фудбал, фокусирајќи се на големите трансфери, преговорите, финансиските договори и влијанието на фудбалските агенти.
Приказната ќе го следи измислениот фудбалски агент Стенли Далтон, чиј лик ќе го толкува познатиот британски актер Демијан Луис, препознатлив по сериите „Homeland“ и „Billions“.
Со проектот се поврзуваат и поранешната фудбалска ѕвезда Тјери Анри и британскиот рапер Дејв.
Роналдо ќе биде извршен продуцент, а според медиумските најави, можно е да се појави и пред камерите.
Со повеќе од две децении искуство во врвниот светски фудбал, Португалецот добро ги познава случувањата зад сцената, кои сега ќе станат основа за телевизиска драма.
Засега не е соопштен датумот на премиерата, ниту платформата на која ќе се емитува серијата.
