Со високите летни температури, многу луѓе се обидуваат полесно да заспијат со вклучен вентилатор, особено во домовите каде што нема клима-уред. Сепак, лекарите предупредуваат дека ако вентилаторот дува директно кон телото во текот на целата ноќ, тоа може да предизвика низа непријатни здравствени проблеми.
Експертите објаснуваат дека постојаното струење на воздухот може да ги влоши симптомите кај лицата кои страдаат од алергии или астма, бидејќи низ просторијата се разнесуваат прашина, полен, грини и други алергени. Дополнително, воздухот може да ја исуши слузницата на носот и грлото, што доведува до затнат нос, болки во грлото и почести будења во текот на ноќта.
Проблем може да претставува и студениот воздух што директно удира во телото. Тој може да предизвика вкочанет врат, болки во грбот, напнатост во мускулите или грчеви, поради што многумина се будат со чувство на непријатност.
Покрај тоа, вентилаторот може да придонесе за сушење на кожата, очите и устата, особено ако е насочен кон лицето или ако воздухот во просторијата е веќе сув.
За побезбедно користење, лекарите препорачуваат вентилаторот да не биде насочен директно кон лицето или телото, туку кон ѕид или таван за воздухот рамномерно да циркулира низ просторијата. Добро е да се користи и тајмер за автоматско исклучување, редовно да се чистат лопатките и филтрите од прашина и во текот на денот да се внесува доволно течност за организмот да остане хидриран.
