Грчката музичарка Јоана Стрига во последните години привлекува сè поголемо внимание не само во Грција, туку и низ Балканот. Нејзините настапи, атрактивниот изглед и специфичниот начин на кој свири на традиционалниот инструмент тумбелеки станаа нејзин препознатлив знак.
Видеата од нејзините настапи редовно се споделуваат на социјалните мрежи, каде Стрига привлекува внимание со темпераментниот сценски настап и енергијата со која ја крева атмосферата пред публиката.
Интересно е што нејзината музичка приказна започнала речиси случајно. Како што открила во интервју во мај 2026 година, на еден од првите настапи немала ниту сопствен тумбелеки, па свирела на позајмен инструмент. Она што започнало како забава постепено се претворило во сериозна професионална приказна.
Кога сфатила дека настапите стануваат важен дел од нејзиниот живот, почнала да посетува часови и дополнително да го усовршува свирењето.
Пред музиката, нејзиниот живот се движел во сосема друга насока. Јоана била студентка по естетика во Патра, а подоцна сцената станала местото на кое почнала да ја гради својата препознатливост.
Иако најголемо внимание привлекува со тумбелеки, Стрига се обидува да изгради кариера и како пејачка. Во 2024 година ја објавила песната „Αχ Ερωτεύτηκα“, а во 2025 година следувала „Ζαβολιές (Έλα Έλα)“.
Таа има искуство и пред телевизиските камери, со појавување во грчката комична серија „Super Mammy“, додека во 2023 година настапила и на MAD Video Music Awards заедно со познатите грчки пејачки Josephine и Anastasia.
Комбинацијата од музика, темперамент и впечатлив сценски настап ја претвори Јоана Стрига во сè попрепознатливо лице на грчката забавна сцена, а нејзината популарност постепено се проширува и надвор од границите на Грција.
