Студентите имаат можност да аплицираат за државна студентска стипендија за академската 2026/2027 година најдоцна до 20 ноември. Министерството за образование и наука (МОН) го објави конкурсот, а пријавувањето се врши исклучиво електронски, преку порталот e-uslugi.mon.gov.mk.
Вкупниот број стипендии останува ист како и минатата година и изнесува 3.000, но за оваа академска година е воведен нов модел на стипендирање. Тој предвидува нови категории и поинаква распределба на финансиската поддршка.
Од Министерството објаснуваат дека целта не е намалување на поддршката, туку нејзино подобро насочување кон различните потреби и потенцијали на студентите.
„Промената не е во намалување на поддршката, туку во нејзино подобро насочување и пошироко препознавање на потребите и потенцијалите на студентите. Се воведува значајно унапредување на досегашниот модел на студентско стипендирање. Новиот модел носи поинаков пристап во распределбата на државната поддршка – пристап кој истовремено ја препознава социјалната ранливост, го вреднува академскиот успех и го поттикнува образованието на кадар во области од стратешко значење за државата“, соопшти МОН.
Посебна поддршка за студенти со попреченост и ретки болести
Од вкупно 3.000 стипендии, 1.200 се наменети за социјална поддршка. Во рамките на оваа категорија, за првпат се воведуваат посебни стипендии за студенти со попреченост и за студенти со ретки болести, при што за секоја од двете групи се предвидени по 50 стипендии.
Според МОН, оваа новина претставува чекор кон поинклузивно високо образование и обезбедување еднакви можности за сите студенти. Министерството наведува дека со новиот конкурс се препознаваат специфичните потреби на овие категории и се поддржуваат нивното право на образование и академски развој.
1.050 стипендии за студии од стратешко значење
Новиот модел предвидува и 1.050 стратешки стипендии за студенти кои се образуваат во области што се сметаат за особено важни за идниот развој на државата.
Студиските програми што се опфатени со оваа категорија се утврдени со одлука на Националниот совет за високо образование и научноистражувачка дејност од 3 ноември 2026 година.
Стипендиите се однесуваат на студиски програми од областа на математиката, физиката, хемијата, земјоделството, шумарството, наставната биологија и рударството.
750 стипендии за студенти со висок просек
Дополнителни 750 стипендии се предвидени за студентите кои остваруваат висок академски успех. За да влезат во оваа категорија, кандидатите треба да имаат просечна оценка од најмалку 8,50 и редовно да ги исполнуваат своите академски обврски.
Од Министерството посочуваат дека на овој начин дополнително се вреднуваат знаењето, посветеноста и трудот на студентите кои постигнуваат забележителни резултати во текот на студирањето.
Колку ќе изнесуваат стипендиите?
Месечниот износ зависи од категоријата во која студентот ќе ја добие стипендијата:
- За стратешките стипендии се предвидени 18.000 денари месечно.
- За социјалните стипендии се предвидени 6.050 денари месечно.
- Истиот износ од 6.050 денари месечно ќе добиваат и студентите со висок академски успех.
Стипендиите ќе се исплаќаат во период од девет месеци во текот на студиската година.
Покрај главниот конкурс за 3.000 студентски стипендии, во тек е и пријавувањето на уште два конкурса за академската 2026/2027 година. Едниот предвидува доделување 15 стипендии за студенти запишани во прва година на студиски програми по македонски јазик, додека другиот се однесува на поврат на средства за купен музички инструмент.
Заинтересираните студенти можат да ги разгледаат условите и потребната документација во официјалниот конкурс на МОН, а пријавувањето се врши преку електронскиот портал e-uslugi.mon.gov.mk.
