Најмалку 40 лица загинаа во нов израелски напад, при што 20 од нив биле убиени во близина на центар за дистрибуција на храна на Хуманитарната фондација Газа (GHF) во Рафа, соопшти Министерството за здравство на Газа. Над 200 лица се ранети.
Сведоци и медицински лица велат дека нападот се случил во момент кога стотици Палестинци чекале хуманитарна помош. Обединетите нации ја осудија новата практика на дистрибуција, нарекувајќи ја „смртоносен систем“.
GHF е нова организација поддржана од САД, која ја презеде дистрибуцијата на храна на три контролни пунктови под израелска воена заштита. Израел тврди дека Хамас ја злоупотребувал хуманитарната помош, додека Хамас го отфрла тоа и обвинува за намерно предизвикување глад.
Раководителот на UNRWA, Филип Лазарини, изјави дека многу луѓе биле убиени во обид да добијат храна и додаде дека Израел сè уште не ги укинал ограничувањата за ОН-агенциите.
Израелската агенција COGAT соопшти дека дозволила влез на 292 камиони со помош оваа недела и дека ќе продолжи со контролирано доставување без дозвола храната да стигне до Хамас.
