Фудбалскиот свет е во шок по трагичната вест од Србија. Младен Жижовиќ, поранешен тренер на Шкупи и актуелен стратег на Раднички Крагујевац, почина на само 44-годишна возраст за време на натпревар од домашното првенство.
Жижовиќ се срушил на теренот во текот на првото полувреме од мечот против Младост Лучани. Лекарскиот тим веднаш интервенирал, а тренерот бил итно пренесен во болница. Но, и покрај сите напори на медицинскиот персонал – животот на младиот стратег не успеа да се спаси. Натпреварот веднаш беше прекинат.
Младен Жижовиќ беше еден од најценетите млади тренери на Балканот. Потекнуваше од Босна и Херцеговина, а во својата кариера предводеше неколку клубови: Слобода Тузла, Зрински Мостар, Радник Бијељина, како и Шкупи, каде што остави длабока трага во сезоната 2023/24.
Со Борац Бања Лука постигна историски успех – го одведе клубот до настап во Лигата на Конференции, најголемиот европски резултат во историјата на клубот. Само пред неколку дена, Жижовиќ ја презеде клупата на Раднички Крагујевац, а трагедијата се случи на неговиот втор натпревар со тимот.
Неговата ненадејна смрт остави длабока празнина во регионалниот фудбал. Колеги, играчи и навивачи од целиот Балкан изразуваат неверување и болка, опишувајќи го како „тренер со срце и визија“.
Спортот денес загуби повеќе од тренер – загуби човек кој го живееше фудбалот со страст, посветеност и човечност.
