Италијанската полиција заплени повеќе од 3,2 милиони евра во готовина, пронајдени во тајни скривници во стан во Каивано, во близина на Неапол. Во големата операција против организираниот криминал биле уапсени 34 лица осомничени за поврзаност со мафијашка организација.
Парите, главно во банкноти од 50 евра, биле завиткани во целофан и сокриени во ѕидови, под подни и ѕидни плочки, како и во фиоки од мебел. Според истражителите, станот практично служел како тајна сеф-соба на криминалната група.
Покрај милионите евра во готовина, полицијата пронашла и 11 луксузни часовници „Ролекс“, огнено оружје и опрема за мерење и дистрибуција на дрога. Количината на пронајдени пари била толку голема што нивното изнесување траело со часови, а потоа биле пренесени со оклопно возило.
Акцијата е резултат на повеќемесечна истрага насочена кон кланот Анџелино, кој се поврзува со неаполската Камора. Истрагата ја предводел обвинителот за борба против мафијата Никола Гратери, а надлежните успеале да пресретнат и комуникации на лица кои, според истрагата, продолжиле да раководат со криминалната организација од затвор.
Важни информации за скривниците биле добиени и од поранешни соработници на кланот кои решиле да соработуваат со истражителите во замена за заштита.
Според финансиските истражители, запленетите 3,2 милиони евра се поврзуваат со криминални активности, меѓу кои трговија со дрога и рекетирање локални бизниси.
