Албанското Специјално обвинителство против корупција и организиран криминал (СПАК) реализираше една од најголемите операции против меѓународна наркоорганизација во последните години. Во рамките на акцијата, 14 лица се уапсени, а запленет е имот и пари вредни милиони евра.
Организацијата, според СПАК, се занимавала со трговија со повеќетонски количини кокаин од Латинска Америка до најголемите европски пристаништа како Хамбург и Антверпен. Истражувањата беа водени врз основа на анализа на шифрирани комуникации преку апликацијата „Sky ECC“, а откриено е дека криминалците переле пари преку сложени финансиски мрежи и ги вложувале нелегално стекнатите средства во недвижнини во Албанија.
Криминалната мрежа контролирала целосен синџир од производство во Латинска Америка, преработка во Парагвај, транспорт во контејнери, до дистрибуција и перење пари во Албанија и странство. Акцијата била изведена во соработка со ЕВРОПОЛ и органите за спроведување на законот од Германија, Белгија, Франција, Холандија, Холандија и Италија.
Специјалниот суд изрекол 16 мерки за обезбедување: 14 лица се задржани во притвор, а две имаат задолжително јавување во суд. Само една од пратките запленети во Хамбург се проценува на неверојатни 1,5 до 3,5 милијарди евра, што е една од најголемите заплени на кокаин во Европа.
Покрај недвижниот имот вреден милиони, во акцијата биле запленети и 111.800 евра во готовина, 4.000 долари и 880.000 албански лек. Оваа операција ја симболизира сериозната борба на Албанија и европските земји против меѓународната организирана криминална трговија со дрога.
