Страшна несреќа се случила на плажа во Австралија, каде што 20-годишно момче било погодено од гром додека пливало во морето. Младиот човек се здобил со тешки повреди и бил пренесен во болница во критична состојба.
Инцидентот се случил во саботата, на 14 ноември, на плажата Умина, на централниот брег на Нов Јужен Велс.
Според очевидците, непосредно пред несреќата времето било сончево, а над плажата немало облаци што би укажувале на непосредна опасност.
„Беше неверојатно гласно. Во тој момент бевме во водата. Небото беше чисто, а сонцето сјаеше. Молњата удри сосема ненадејно“, раскажал еден од присутните.
Друг капач изјавил дека излегол од морето само неколку моменти пред ударот на громот.
На местото веднаш пристигнале екипи на брза помош, кои подолго време го реанимирале повреденото момче на самата плажа.
По укажаната прва помош, тој бил пренесен во болницата Госфорд во тешка состојба.
Локалниот советник Џаред Рајт изразил сочувство и поддршка до семејството на повредениот, заблагодарувајќи им се на спасувачките служби за брзата интервенција.
Метеоролозите предупредуваат дека молњите можат да удрат и на голема оддалеченост од бурните облаци, па дури и кога небото изгледа ведро.
Поради тоа, при првиот звук на грмотевици се препорачува веднаш да се напушти водата и да се побара безбедно засолниште.
Според последните објавени информации, момчето се наоѓа во критична состојба, а лекарите се борат за неговиот живот.
