Потресна исповед на семејство од Загреб открива една поинаква страна од животот на 32-годишниот Кристијан Јосип Периш, кој почина на 21 октомври во психијатриската болница „Свети Иван“ во Загреб.
Гордан Маровиќ, татко на 16-годишниот Ренео, момче со аутизам кое не комуницира вербално, раскажа колку Кристијан му значел на неговото семејство.
Кристијан, кого сите го нарекувале Кики, бил кинезиотерапевт кој им помагал на родителите во грижата за нивниот син.
Иако бил висок речиси два метра и тежел околу 120 килограми, семејството го памети како исклучително нежен, смирен и трпелив човек.
Уште при нивната прва средба се случило нешто што родителите никогаш нема да го заборават.
Кога Кристијан му се претставил на момчето, Ренео, кој ретко зборувал, веднаш го повторил неговиот прекар – „Кики“.
Оттогаш меѓу нив се создала посебна поврзаност.
Кристијан го носел момчето на прошетки, го чувал и му помагал да се смири во моментите кога доживувал силни емоционални испади.
Таткото раскажува дека Ренео понекогаш го удирал, гризел и гребел Кристијан, но тој никогаш не покажувал лутина.
„Двапати го гризна, еднаш навистина силно. Знаеше и да го изгребе, па дури и да му ја скине маицата. А Кики цело време остануваше смирен“, раскажал таткото.
Семејството вели дека со него се чувствувало безбедно, особено за време на прошетките, бидејќи нивниот син понекогаш можел ненадејно да истрча на улица.
Кога ја слушнале веста за смртта на Кристијан, останале во шок.
Уште потешко им било кога ги виделе вознемирувачките снимки од психијатриската болница и сфатиле дека жртвата е човекот кој со толку многу љубов се грижел за нивното дете.
За семејството Маровиќ, Кристијан не бил само човек кој им помагал, туку пријател на кого целосно му верувале.
„Беше нежен, внимателен и неверојатно трпелив“, се присетува таткото.
Смртта на Кристијан е предмет на кривична истрага, а четворица медицински техничари се во истражен притвор под сомнение за тешко убиство.
