Во југозападниот дел на Турција се наоѓа необичен град кој повеќе од еден век стои напуштен, со околу 2.500 куќи, празни улици и градби кои полека ги освојува природата.
Станува збор за Кајакој, познат и како „градот на духовите“, кој денес претставува туристичка атракција со влезница од само три евра.
Некогаш градот бил познат под името Левиси и во него живееле најмалку 10.000 православни Грци. Населението главно се занимавало со занаетчиство и трговија, а градот бил значаен економски центар во регионот.
Сепак, сè се променило по грчко-турската војна во 1922 година.
Со присилната размена на население меѓу Грција и Турција, грчките жители морале да ги напуштат своите домови.
На нивно место пристигнале муслимански семејства од Грција, но повеќето не успеале да се приспособат на новата средина и набргу се отселиле.
Оттогаш градот постепено пропаѓал, а земјотресите, дождовите и временските услови дополнително ги оштетиле зградите.
Денес, посетителите можат да прошетаат низ тесните камени улици, да ги разгледаат старите цркви, училиштето и историските градби.
Посебно впечатливи се куќите без покриви, обраснати со зеленило, кои и по сто години сведочат за животот што некогаш постоел таму.
Според локалните жители, многумина од луѓето што биле принудени да заминат плачеле при напуштањето на своите домови, надевајќи се дека еден ден ќе се вратат.
Но тоа никогаш не се случило.
Иако историскиот дел од Кајакој останува ненаселен, градот денес привлекува туристи кои сакаат да ја почувствуваат неговата необична атмосфера.
