Безбедносните сили во Гватемала се обидуваат да ја вратат контролата врз три затвори, откако затворениците се побунија и зедоа најмалку 46 заложници, најмногу затворски чувари, меѓу кои и еден психолог.
Министерот за внатрешни работи Марко Антонио Виледа изјави дека нема убиени или повредени заложници, нагласувајќи дека немирите биле координирани и организирани од членовите на бандата Барио 18. Според него, бандата се побунила откако нејзиниот водач побарал преместување во друг затвор со подобри услови и посебен третман.
Од Министерството за внатрешни работи соопштија дека востанијата се директна реакција на мерките за укинување на привилегиите на водачите на криминалните групи.
„Нема да соработуваме со терористи. Нема договори и нема враќање на привилегии под уцена“, порача Виледа на прес-конференција.
Во градот Ескуинтла, полицијата и армијата го опколија затворот „Реновасион 1“, додека противпожарни и итни служби се распоредени во близина. Затворениците, дел маскирани со импровизирани покривки за лице, можеле да се забележат од стражарските кули.
Еден од затворениците, зборувајќи зад бодликава жица, изјавил дека не се чувствува безбедно и побарал преместување, обвинувајќи ги властите дека не можат да ја гарантираат ниту сопствената, ниту безбедноста на затворениците.
Иако и претходно во Гватемала имало заложнички кризи во затворите, овој инцидент се смета за еден од најсериозните, поради големиот број заложници и истовремените немири во повеќе објекти.
