Итно предупредување е издадено во Берлин по серија случаи на труење поврзани со гумени бонбони за кои се сомнева дека биле контаминирани со опасна дрога. Еден 42-годишен маж починал, додека уште две лица завршиле во болница со сериозно нарушена здравствена состојба.
Надлежните здравствени служби истражуваат три случаи кои, според досегашните информации, може да бидат поврзани со консумирање на исти гумени бонбони. Производите биле означени како бонбони што содржат THC, активната психоактивна состојка во канабисот, но симптомите кај затруените лица укажуваат дека во нив можеби се наоѓала друга, многу поопасна супстанција.
Најтешкиот случај бил регистриран во вторникот во берлинската населба Нојкелн. Итните служби во 10:26 часот биле повикани на улицата Киницер, каде што 42-годишен маж бил пронајден во состојба на срцев застој.
Екипите веднаш започнале со реанимација, но и покрај напорите не успеале да го спасат. Телото на починатиот потоа било предадено на полицијата.
Само четири дена претходно биле пријавени уште два случаи на истата адреса во берлинската населба Фридрихсхајн. Таму била пронајдена 30-годишна жена со сериозно нарушена свест. Околу еден час подоцна, на истата локација, итните служби затекнале и 40-годишен маж со слични симптоми. Двајцата биле итно пренесени во болница.
Симптомите кај трите лица предизвикале сомнеж за труење со опиоидна супстанција. Кај вакви труења може да се појават нарушена или целосно изгубена свест, забавено и плитко дишење и карактеристично стеснување на зениците.
Меѓу можните супстанции од оваа група се фентанил, хероин, морфин, оксикодон и метадон, но засега не е потврдено која точно супстанција била присутна во бонбоните.
Од надлежната служба потврдиле дека биле регистрирани повеќе случаи на труење со различен степен на сериозност, при што клиничката слика одговарала на таканаречен опиоиден токсидром по консумирање на бонбоните означени како „THC“.
Кај двајца од преживеаните пациенти бил применет налоксон, лек кој ги блокира ефектите на опиоидите и може брзо да помогне во повторното воспоставување на нормалното дишење.
Истрагата продолжува, а здравствените и безбедносните служби се обидуваат да утврдат што точно содржеле бонбоните и како опасната супстанција се нашла во производите што биле консумирани од затруените лица.
