Претседателот на Србија, Александар Вучиќ, потврди дека во недела, 27 септември, ќе поднесе оставка од функцијата претседател на Република Србија. Тој најави дека оставката ќе ја поднесе во вечерните часови и тогаш јавно ќе ги образложи причините за својата одлука.
Вучиќ ова го изјавил пред новинарите во Њујорк, каде што престојува по повод Генералното собрание на Обединетите нации.
„Во недела е напорен ден, во недела навечер поднесувам оставка, мислам дека ќе биде околу осум часот навечер“, рекол Вучиќ, додавајќи дека тогаш граѓаните ќе ги слушнат и причините за неговата одлука.
Неговата најава за 27 септември не е нова. Вучиќ претходно го посочи истиот датум и најави дека по напуштањето на претседателската функција ќе продолжи со политичките активности како граѓанин.
Што ќе се случува по оставката?
Вучиќ претходно објасни дека сака претседателскиот кабинет да биде испразнет веднаш по неговото заминување, за претседателката на Народното собрание, Ана Брнабиќ, да може да ја преземе функцијата вршител на должноста претседател на Србија. Според неговите најави, веќе од 28 септември тој би започнал со предизборната кампања како обичен граѓанин.
Паралелно со најавата за оставката, Вучиќ во Њујорк зборувал и за други важни прашања за Србија.
По разговорот со Путин очекува повеќе информации за НИС
На прашањето дали станува појасно какво решение може да се најде за иднината на Нафтената индустрија на Србија (НИС), Вучиќ рекол дека во моментов не знае што точно да одговори.
Тој изразил надеж дека по разговорот со рускиот претседател Владимир Путин, кој би требало да се одржи во наредните денови, ќе има повеќе информации за можниот исход околу НИС.
ЕКСПО 2027 меѓу темите во разговорите во Њујорк
Српскиот претседател во Њујорк зборувал и со повеќе светски лидери за организацијата на специјализираната изложба ЕКСПО 2027 во Белград.
Вучиќ нагласил дека Србија во текот на одржувањето на манифестацијата мора да биде добар домаќин и дека земјата се подготвува за голем меѓународен настан.
Специјализираната изложба ЕКСПО 2027 во Белград е закажана од 15 мај до 15 август 2027 година, под темата „Игра(ј) за човештвото: спорт и музика за сите“.
