Смртта на 32-годишниот Кристијан Јосип Периш во психијатриската болница „Свети Иван“ во Загреб продолжува да ја потресува хрватската јавност, а медицински експерти откриваат како треба да се постапува со пациенти во кризна состојба.
Психијатарот Жељко Храбар, кој има 35-годишно искуство, во емисијата „Отворено“ на ХРТ објасни дека физичкото ограничување на пациентите мора да биде последна мерка, а не прв избор.
Тој категорично ги осуди постапките забележани на снимките од болницата во Загреб.
„Не постои никакво сценарио во кое е оправдано на пациент да му се притиска перница на лицето или да се удира“, нагласи Храбар.
Според него, во најголем број случаи агресивното однесување може да се смири преку разговор, трпение и воспоставување доверба.
Доколку тоа не успее и постои непосредна опасност, медицинскиот тим однапред подготвува план за интервенција.
„Техничарите го чекаат мојот знак. Секој е задолжен за одреден екстремитет, кој го придржува со рацете, без удирање и стискање“, објасни психијатарот.
Потоа, доколку е неопходно, пациентот се ограничува со специјални медицински ремени и му се дава претходно пропишаната терапија.
Професорката Сунчана Роксандиќ предупреди дека снимките од случајот Периш покажуваат сериозни отстапувања од правилата за постапување со пациенти.
Таа нагласи дека одговорноста не треба да се бара само кај поединечни здравствени работници, туку мора да се испита и начинот на организирање и контролирање на работата во болницата.
По смртта на Периш, четворица медицински техничари се осомничени за тешко убиство и им е определен истражен притвор.
Здравствената инспекција утврдила неправилности во постапувањето со пациентот, а случајот е предмет и на дополнителни проверки.
Експертите предупредуваат дека секој пациент, без оглед на неговата здравствена состојба, има право на достоинствен третман, заштита и безбедност.
