Кривична пријава е поднесена против вработен во Министерството за внатрешни работи поради сомнение дека испраќал пораки со заканувачка содржина до жител на Скопје.
Како што информираат од МВР, Одделот за внатрешна контрола, криминалистички истраги и професионални стандарди поднел кривична пријава до Основното јавно обвинителство Скопје против В.Н., поради основи на сомнение за сторено кривично дело „загрозување на сигурноста“.
Пријавениот работи како документарист во Отсекот за статистика и документирање во ЕВР Кисела Вода при СВР Скопје.
Според информациите од полицијата, на 18 март 2026 година, преку мобилна апликација, тој испратил пораки со заканувачка содржина до лице од Скопје.
Причината за заканите, според пријавата, било претходно недоразбирање меѓу оштетениот и синот на пријавениот.
Покрај кривичната пријава, Одделот за внатрешна контрола ќе поднесе и предлог за поведување дисциплинска постапка за утврдување одговорност поради кршење на работниот ред и дисциплина.
Предвидено е и поднесување предлог за негово времено отстранување од работното место, односно суспензија, до завршувањето на дисциплинската постапка.
Надлежните институции ќе одлучуваат за понатамошниот тек на постапката и евентуалната одговорност на пријавениот.
