Вознемирувачки случај е регистриран во средно училиште во Тетово, каде што полициски службеници пронашле пиштол кај 15-годишен ученик.
Како што информираат од Министерството за внатрешни работи, на 13 ноември, околу 14:40 часот, полициски службеници од СВР Тетово извршиле преглед на малолетник од Тетово.
Прегледот бил извршен во присуство на негов родител и училишниот педагог.
Кај 15-годишникот биле пронајдени и одземени пиштол „Зораки 918-Г“, калибар 9 милиметри, и една рамка.
По откривањето на оружјето, полициските службеници го лишиле од слобода малолетникот, кој потоа бил задржан во полициска станица.
За случајот бил известен и надлежен јавен обвинител.
Од МВР информираат дека по целосното документирање на настанот ќе следува соодветен поднесок.
Засега не се соопштени дополнителни информации за тоа како малолетникот дошол до пиштолот и зошто го носел во училиштето.
